حضرت بختیار کاکیؒ کے ملفوظات فوائد السالکین میںلکھا ہے کہ سلطان التمش کی طرف سے عام اجازت تھی کہ جولوگ بھی فاقہ کرتے ہوں اس کے پاس لائے جائیں اورجب وہ آتے تو ان میں سے ہر ایک کو کچھ نہ کچھ دیتا اور ان کو قسمیں دے کرتلقین کرتا کہ جب ان کے پاس کھانے پینے کو کچھ نہ رہے یا ان پر کوئی ظلم کرے تو وہ یہاں آکر عدل وانصاف کی زنجیر جوباہر لٹکی ہوئی ہے ہلائیں تاکہ وہ ان کے ساتھ انصاف کرسکے،ورنہ قیامت کے روز ان کی فریاد کا بار اس کی طاقت برداشت نہ کرسکے گی۔سلطان التمش کے اس حسن سلوک سے مسلم اور غیر مسلم دونوں بلا تفریق مستفید ہوتے تھے۔
ہندوموٴرخین لکھتے ہیں کہ یوپی(ہندوستان کی ریاست) چھ سوسال تک مسلمانوں کے زیر نگیں رہی،لیکن یہاں مسلمان صرف چودہ فیصدی ہیں جو اس بات کا ثبوت ہے کہ ہندو مذہب محفوظ رہا اورجبری اشاعتِ اسلام نہیں ہوئی اور نہ ہی ہندوؤں کوزبوں حال بنایاگیا ،کیونکہ وہاں کےمسلم بادشاہ وقت اسلامی اصولوں کے پیش نظر اور نبی کریمﷺ کی تعلیمات پر عمل کرتے ہوئے غیر مسلموں سے حسن سلوک کی اعلیٰ مثالیں پیش کرتے رہے۔وہاں کے لوگوں کے مذہبی اور معاشرتی نظام میں مداخلت نہ کی ۔اگر ان میں واقعی یہ خوبیاں نہ ہوتیں تو خون سے ہولی کھیلنے والے ،اپنے سینوں کو نوک شمشیر اور نوک سنان سے چھلنی کرنے والے راجپوتوں کی سرزمین میں ان کا اور ان کے ہم مذہبوں کا قدم جمنا آسان نہ تھا۔اس لیے یہ تسلیم کرنا پڑے گاکہ مسلمانوں کی حکومت کے دور عروج میں اچھے اور مخلص حکمران گزرے۔